Surf na praia de Razo | 📷 Turismo Carballo

19 de outubro de 2022 - Carballo forma parte da recen creada Rede de Pobos do Surf, unha iniciativa con vilas de toda España (Euskadi, Cantabria, Galicia e Asturias) que persegue a xestión sostible do turismo de surf dun modo integral, que contribúa á conservación do medio natural, fomentando a protección das ondas e da costa e a súa regulación. Así mesmo, promoverá o patrimonio cultural, con especial énfase na gastronomía e a historia de cada municipio que pertenza á rede. A iniciativa recolle a creación de novos produtos turísticos ligados a actividades sostibles tematizadas (surf e patrimonio cultural, surf e lecer en familia, e surf e gastronomía), tendentes á desestacionalización do turismo nos respectivos territorios.

Ademais de Carballo e a Mancomunidade de Ferrol, están implicadas vilas de Asturias, Cantabria e Euskadi

Emprenderanse accións concretas como a creación dunha imaxe de marca propia; a posta en marcha dunha web corporativa de Pobos do Surf e perfís nas diferentes redes sociais; campañas de divulgación e sensibilización a través das redes e de promoción en medios de comunicación; deseño e execución de formación online para a mellora da competitividade do sector turístico vinculado ao surf respecto á enerxía e dixitalización, e deseño e execución de xornadas de asesoramento para a posta en marcha de novos negocios ou liñas de servizos.

Pulo para escolas de surf e empresas relacionadas con este deporte

Así mesmo, escolas de surf e surf camps (en Carballo hai catro activos neste momento), surf shops, shapers (fabricantes artesáns de táboas de surf), empresas provedoras de material, empresas de aloxamento e restauración, empresas de organización de eventos deportivos, así como outros operadores turísticos relacionados, beneficiaranse especialmente do proxecto a través da participación directa nas accións propostas e como beneficiarios indirectos do desenvolvemento sostible do turismo de surf. Nesta liña, estímase a existencia dunhas 120 empresas específicas ligadas ao surf no conxunto das entidades locais que promoven a iniciativa. Ademais, non se descarta ampliar o número de “socios”, e, polo tanto, o territorio da rede en base aos resultados desta primeira experiencia que impulsan localidades hoxe en día auténticos referentes como destinos surf en España.

Carballo e a Mancomunidade de Concellos da Comarca de Ferrol, en Galicia, e os municipios de Getxo (Euskadi), Ribamontán al Mar (Cantabria) e Castrillón (Asturias) son os municipios que formarán parte desta rede, recibindo unha importante axuda económica do programa Experiencias Turismo España. O Ministerio de Industria, Comercio e Consumo vén de conceder unha subvención próxima ao medio millón de euros que permitirá afrontar este ambicioso proxecto turístico co respaldo dos fondos europeos Next Generation, tal como anunciaron os representantes das entidades participantes, entre eles o Alcalde de Carballo, Evencio Ferrero, nun acto celebrado no Océano Surf Museo de Valdoviño, o único dedicado en España a este deporte.