Carballo a un paso

Compartir:

Carballo por Etapas adianta o inicio da temporada de verán para o sector da hostalaría

Representantes do Concello de Carballo, Axober, empresas colaboradoras e establecementos participantes presentaron a quinta edición da ruta

Carballo por Etapas 2017

Luciano Calvo, Isidro Varela, Xosé Regueira, Evencio Ferrero e Raúl Cantorna, na presentación

Agora si que empeza a conta atrás para Carballo por Etapas. Hoxe reuníronse no Fórum Carballo representantes do Concello, de Axober, das empresas colaboradoras e dos establecementos participantes para presentar a quinta edición dunha ruta de tapas que xa é un referente dentro e fóra do noso concello. Este ano cunha imaxe renovada que se traslada ao cartel e tamén aos premios que poderán conseguir os clientes dos 18 locais coas súas tapas: libretas, chapas, abridores de botellas e bolsas de tela son algunhas das novidades que se agochan nos boletos xunto coas clásicas botellas de viño ou, este ano tamén, copas para degustalo.

Carballo por Etapas 2017

Cartel do Carballo por Etapas 2017

Carballo por Etapas contribúe, como destacou o concelleiro de Promoción Económica, Xosé Regueira, a anticipar o verán para o sector da hostalería, do mesmo xeito que outros eventos promovidos tamén dende o Concello de Carballo están a conseguir que se alongue máis alá do mes de agosto. “Eu creo que para a poboación en xeral é positivo, pero para o sector hostaleiro en particular é moi positivo”, sinalou, sobre todo se despois destas dúas fins de semana que se aveciñan os datos demostran que foi posible xerar unhas boas expectativas económicas para o sector.

Colaboradores

Con Xosé Regueira sentáronse na mesa do auditorio o alcalde de Carballo, Evencio Ferrero; o presidente e o secretario de Axober, Isidro Varela e Raúl Cantorna, e Luciano Calvo, conselleiro delegado do Grupo Calvo, que un ano máis colabora con Carballo por Etapas, xunto con outras empresas como Bodegas Carballo, Proquiber, Distribucións Cotelo, Disboa e Exclusivas Rivas Suárez. Todas son importantes, dixo o alcalde, pero quixo aproveitar o acto para expresar o seu agradecemento ao Grupo Calvo, “porque xusto é recoñecer, como carballeses, carballesas, como persoas que aquí decidimos vivir, que moita da actividade que se realiza no noso concello, cultural, deportiva e mesmo social ou económica, como é este caso, é posible porque hai unha empresa que ten a responsabilidade social corporativa moi clara e sempre aposta por Carballo”.

A quinta edición de Carballo por Etapas arrancará o venres 26 pola tarde coa saída do tren turístico cedido polo Concello de Cabana de Bergantiños, e que, como é habitual, fará un percorrido polos 18 establecementos participantes: A Barra Bar, A Cervecería de Luis, A Nova Ferradora, Cerveceria A Tapería (antes Cafés A Cafeteira), cafetería Abastos, café bar Embajador, cafetería bar Ginebra, cafetería Habanos 79; cervecería Ágora, cervecería Dublín, cervecería La Bombonera, mesón A Cabaña, mesón As Viandas, restaurante El Hórreo, restaurante Mesón do Pulpo, restaurante vinoteca A de Pako, taberna O Mexillón e trattoría pizzería Vesuvio.


Ligazóns

Feader Ministerio de agricultura, alimentaci?n y medio ambiente Xunta de Galicia Deputaci?n da Coru?a Galicia Agader Costa da Morte - Terra Atl?ntica