7 de xullo de 2021 - O Circuíto de Motor de Bértoa acolle entre o 9 e o 11 de xullo o 13 Autocross Carballo, que volve ás pistas con récord de participación cunha proba decisiva do Campionato de España. Por primeira vez acadaranse os 117 vehículos, que aproveitarán ao máximo a capacidade das instalacións. E ademais de baterse o récord local, tamén rexistramos o número máis alto de participantes de todo o circuíto estatal neste 2021. Toas as categorías están moi emocionantes, pero especialmente a de kartcross. A organización recae nesta ocasión no Club Rally Coruña, que conta coa colaboración do Concello de Carballo. Precisamente Ernesto Rumbo, de Rally Coruña, sinala que "o circuíto de Bértoa é unha instalación na que lles encanta correr aos pilotos” e subliña a forte implantación do autocross en Carballo e Bergantiños e a gran calidade dos e das deportistas locais. De feito, unha das escasísimas mulleres participantes é a pontecesá Sandra García, que volve á competición con moitas gañas despois dunha época apartada dos circuítos.

Este ano, ademais da tradicional colaboración coa Cruz Vermella, incluirase tamén á asociación Aspaber (Asociación de Pais de Discapacitados Psíquicos de Bergantiños). Por último, hai que incidir na importancia de que o autocross de Carballo sexa un evento seguro, e apelamos ao respecto das normas de prevención da COVID-19. O uso de máscara será obrigatorio e haberá límite de aforo. Xa están vendidas 270 entradas, polo que as persoas que non queiran arriscar poden realizar as súas reservas no número de teléfono 689 844 185.

Ligazóns