Volve a Feira das Oportunidades!
O sábado 9 e domingo 10 de marzo o Rego da Balsa volve a encherse cunha carpa na que atoparedes as mellores gangas do comercio carballés
![Feira das Oportunidades Feira das Oportunidades](media/../media/img/5cartel_web.jpg)
Seguro que hai algunha cousiña que quedáchedes coas gañas de comprar este inverno. Un par de zapatos, ese cinto, aqueles deportivos para a nena... Todo iso e a un prezo inmellorable poderedes atopalo na Feira das Oportunidades, que cumpre once anos no calendario do comercio carballés e do Centro Comercial Aberto (CCA). Ademais, non só de roupa e calzado vive a feira, xa que tamén poderedes atopar oferta en tecnoloxías e mesmo en automoción, entre outros. Unha carpa de 1.100 metros cadrados para acoller a 40 establecementos do comercio local.
A cita, o sábado 9 e o domingo 10 de marzo en horario ininterrompido durante todo o día, non só co comercio, senón tamén con actividades de animación e moitas sorpresas para animar ás veciñas e veciños que se acheguen a pasar un bo rato de compras. O presidente do CCA Carballo, entidade organizadora da feira xunto co Concello, a Xunta de Galicia e a Deputación da Coruña, subliña o feito de que participen 40 establecementos e de que todos sexan de Carballo: “é un aliciente para nós e fala da fortaleza do comercio local, ademais de darlle un valor engadido á feira, porque a xente coñece o comercio que vai estar nela".
Agora que xa tendes todos os datos, non esquezades marcar a data no calendario! Mercade no comercio local!