Axenda da finde
Música medieval e coral, arte e creatividade con Peter´s Room ou unha nova ruta de Senda Nova para aproveitar o mes de novembro
VENRES
![Pres de Cambrai Pres de Cambrai](media/../media/img/cambrai1T.jpg)
Pres de Cambrai empregan instrumentos medievais
NCM. “O segredo do Pergamiño Vindel”. Pazo da Cultura. 21.00 h. O Novembro con Música (NCM) ofrece un dos concertos máis orixinais do programa deste ano con Pres de Cambrai, realizando unha viaxe á Idade Media. Os integrantes da formación son músicos de consolidada experiencia no ámbito da chamada "música culta" e forman parte doutras agrupacións musicais de grande relevancia. Trátase dun concerto e dunha narración da transcrición que se fixo do misterioso e interesante Pergamiño Vindel que contiña sete cantigas de amigo asinadas polo trobador vigués Martín Códax. Un espectáculo que recrea, a través da palabra e da música, o relato dos misterios que, durante séculos se agocharon neste pergamiño, dándonos a coñecer a lírica profana galego portuguesa, cando acaban de cumprirse 100 anos do seu achádego. Entrada de balde.
SÁBADO
![Festival de corais Festival de corais](media/../media/img/airesT.jpg)
Coro Aires de Bergantiños
Café tertulia sobre "As violencias contra as mulleres". Pazo da Cultura. 11.30 h. A Asociación Cultural Lumieira organiza un almorzo coa activista feminista e Vicepresidenta da Deputación da Coruña, Goretti Sanmartín Rei, para conversar sobre "As violencias contra as mulleres" no marco dos actos para conmemorar o 25 de novembro, Día Internacional pola eliminación da violencia contra as mulleres. Están convidadas todas as persoas interesadas en afondar neste tema que tanto está a preocupar á nosa sociedade, e que, desgraciadamente, deixa vítimas mortais demasiado a miúdo. Entrada de balde.
NCM. Festival de Corais. Pazo da Cultura. 21.00 h. Dúas das agrupacións máis importantes da comarca, a Coral Polifónica de Bergantiños e o Coro Aires de Bergantiños, celebran o mes da música nun concerto moi especial no que as dúas formacións interpretan temas de variada procedencia, estilo e xéneros musicais. Estas dúas corais son un referente na música vocal da comarca pola súa traxectoria, así como pola súa profesionalidade e diferenzas á hora de interpretar o seu repertorio. Mentres a Coral se decanta por temas máis clásicos da polifonía o Coro Aires, pola súa parte, dedícase máis á música tradicional galega. Ao remate, as dúas formacións teñen preparada unha sorpresa musical. Entrada de balde.
SÁBADO E DOMINGO
![Peter´s Room Peter´s Room](media/../media/img/0petersroomTT.jpg)
Peter’s Room. 2º andar do Mercado Municipal. De 11.00 a 21.00 h. Chega a Carballo Peter's Room, un proxecto que fai confluír nun mesmo espazo a deseñadores e creadores emerxentes, de distintas áreas e sectores nun ambiente distendido e familiar onde non soamente se dan a coñecer produtos, servizos e marcas, senón que se crea unha experiencia única, onde o lecer e o entretemento teñen un papel importante. Desta volta, contan coa colaboración da carballesa Asociación Crea Formas, coa que ofrecerán obradoiros. O pago para participar nos talleres é unha doazón de comida para os canciños de Amigos de los Perros de Carballo. Ademais, haberá concertos e a elaboración dun mural en directo co que o público poderá colaborar. Diversión, arte, creación e oportunidades para comprar produtos orixinais e de calidade no Mercado Municipal. Non faltedes!
DOMINGO
![Senda Nova Senda Nova](media/../media/img/wolframT.jpg)
"Pegadas do Wolframio" pasa por Monte Neme
Outono en marcha. Ruta “Pegadas do Wolframio”. 8.15 h. O IV Outono en Marcha ofrece percorridos de sendeirismo por lugares de especial valor patrimonial, histórico, natural e paisaxístico de Bergantiños, mudando o punto de vista para observar a comarca a través da choiva, das follas secas e do outono. O domingo 22 de novembro é o roteiro "Pegadas do Wolframio" polos concellos de Carballo e Malpica. Unha das de maior dureza polos abundantes desniveis, ten saída en Oza e chegada en Cambre. Pasa por Razo da Costa e polas casas da mina de Monte Neme, un espazo cunha vista espectacular. Remata na Igrexa de Cambre en Malpica. Distancia a percorrer: 16 quilómetros. A cita, que dura todo o día, ten programada a saída dende a sede de Senda Nova na rúa Venezuela de Carballo. O prezo para partipar é de 6 € para adultos/as e de 3 € para menores de idade. Inscricións no 696 155 232.