VENRES

Teatro. Ultranoite "O país dos Ananos". Pazo da Cultura. 21.00h. O grupo Chévere, que en 2014 se converteu na primeira compañía galega en recibir o Premio Nacional de Teatro, estará en Carballo para presentarnos "Ultranoite no país dos ananos". Humor e transgresión de xéneros estarán moi presentes nesta sucesión de sketchs que constitúen esta caste de cabaré ou musical ao redor da derrota.

TODA A FINDE

Expovoda. Fórum. De 11.00 a 21.00h.  O Centro Comercial Aberto organiza nesta segunda fin de semana a segunda edición de Expovoda, que nesta ocasión contará cun total de 25 expositores onde estarán representados os máis diversos sectores relacionados coa celebración de vodas, comuñóns e outros eventos similares, dende téxtil, até xoeiería, perruquería ou fotografía. Prezo da entrada: 2 euros. Máis info aquí.

Exposición fotográfica "Tinta". Pazo da Cultura. De 18.00 a 21.00h. O fotógrafo carballés Juan Casares adéntrase no mundo da tatuaxe na súa exposición "Tinta". Son, en total, 21 fotos a cor, froito do traballo realizado durante seis meses polo artista en contacto cun estudo de tatuaxe. Pode visitarse todos os días da semana, de 18.00 a 21.00 horas, no andar -1 do Pazo da Cultura. Máis info aquí.

Exposición "Pintura sobre papel". Pazo da Cultura. Xulio García Rivas presenta, no Pazo da Cultura, unha mostra composta por diversos acrílicos e acuarelas que falan de pintura e de abstracción e figuración como conceptos non opostos. A paisaxe da Costa da Morte deixa unha intensa pegada nos últimos traballos deste artista. A mostra pode visitarse todos os días da semana, de balde, no terceiro andar do Pazo da Cultura.

Xornadas de interpretación da lagoa de Traba: A asociación carballesa Senda Nova organiza, nesta fin de semana, unhas xornadas de interpretación da Lagoa de Traba, no concello de Laxe. A sesión inicial será o sábado pola tarde no local social de traba, a partir das catro, cunha serie de tres charlas que abondarán en aspectos como a importancia ecolóxica deste espazo natural e a súa riqueza ornitolóxica. A segunda e última sesión consistirá nunha saída ao medio o domingo pola mañá, que incluirá o avistamento de aves e unha pequena ruta. O punto de quedada será na propia lagoa. A participación é libre.