Un sábado de moito deporte en Razo
![Surf en Razo Surf en Razo](media/../media/img/sereas_e_piratas_deportes_surf.png)
Surf en Razo
Este sábado, música e deporte daranse a man no festival Sereas e Piratas en Razo. A xornada será un concentrado de surf, volei praia, skate e capoeira.
Coincidindo co festival, celebraranse o Campionato de Surf Interclubes, no que participarán diversas escolas de surf. Ademais, terá lugar a segunda edición do torneo de volei-praia Sereas e Piratas e o campionato open de skate en minirampla. E, quen teña curiosidade pola capoeira, poderá probar na clase ao aire libre que se organizará de balde.
Torneo de volei praia
![Volei praia en Razo Volei praia en Razo](media/../media/img/sereas_e_piratas_deportes_volei_450_horizontal.png)
Volei praia en Razo
O nordés parece que non vai acompañar o sábado, así que haberá que esperar ao venres para que a organización decida se o torneo se pode celebrar ou non. Se as previsións resultan favorables e o vento deixa que a competición se poida levar a cabo, os partidos iniciaranse ás once da mañá e rematarán a iso das sete da tarde. Ao redor das seis e media xogaranse as semifinais e as finais. Xa hai apuntadas parellas da Coruña, Camelle, Noia, Carballo Pontevedra ou Rianxo.
O obxectivo da organización, porén, é que cada vez compitan máis persoas de Carballo, dado o éxito que a práctica deste deporte ten en Razo, onde, cada día, xogan ao redor dunhas 150 persoas (o dobre nalgunhas ocasións) nos catro campos do areal. O volei praia permite continuar no verán coa práctica do volei, un deporte con gran arraigo en Carballo dende o nacemento da asociación deportiva Xiria na localidade a principios dos oitenta.
Aula aberta de capoeira
![Capoeira Capoeira](media/../media/img/capoeira500px.jpg)
Capoeira
Se queres probar a ver que tal se che dá a capoeira, terás tamén oportunidade de facelo este sábado, e de balde.
A sesión estará organizada pola Asociación Capoeira de Bergantiños, que forma parte da asociación Abadá, comprometida coa difusión desta arte brasileira en diferentes partes do mundo.